ଅନୁଗୋଳ: ମଦ ଦୋକାନ କର୍ମଚାରୀ ଙ୍କ ଠାରୁ ଟଙ୍କା ଲୁଟ । ଗୁଳି ଓ ଭୁଜାଲିରେ ଆକ୍ରମଣ କରି ଟଙ୍କା ଲୁଟିନେଲେ ଦୁର୍ବୃତ୍ତ । ଘଟଣା ଘଟିଛି ଅନୁଗୋଳ ଜିଲ୍ଲାର ଅନୁଗୋଳ ଟାଉନ ଥାନା କୁରୁଡ଼ୋଲ ଗାଁ ନିକଟରେ । ଆଜି ସକାଳେ ଜଣେ ମଦ ଦୋକାନ କର୍ମଚାରୀଙ୍କୁ ମରଣାନ୍ତକ ଆକ୍ରମଣ କରି ତାଙ୍କ ଠାରୁ ଟଙ୍କା ଲୁଟ୍ ହୋଇଛି। ଲୁଟର ଶିକାର ହୋଇଥିବା ମଦ ଦୋକାନ କର୍ମଚାରୀ ହେଲେ ଶେଷନାଥ ଗୁପ୍ତା।
ସୂଚନାନୁସାରେ ଶେଷନାଥ ଗୁପ୍ତା ଶର୍ମା ଛକସ୍ଥିତ ଏକ ମଦ ଦୋକାନରୁ ଟଙ୍କା ନେଇ ବାଇକରେ ଅନୁଗୋଳ ଆସୁଥିଲେ । ସେଶନାଥ ଙ୍କୁ କୁରୁଡ଼ୋଲ ଗାଁ ନିକଟରେ ଆସୁଥିବା ବେଳେ କିଛି ଲୋକ ହଠାତ୍ କାରରେ ଆସି ତାଙ୍କ ଉପରକୁ ଗୁଳି ଚଳାଇବା ସହ ଭୁଜାଲିରେ ଆକ୍ରମଣ କରିଥିଲେ। ଏଥିସହ ତାଙ୍କ ଠାରୁ ଟଙ୍କା ବ୍ୟାଗ୍ ନେଇ ଯାଇଥିଲେ। ଏହି ଆକ୍ରମଣରେ ଶେଷନାଥଙ୍କ ଛାତି ଓ ହାତରେ ଆଘାତ ଲାଗିଛି। ଗୁରୁତର ଅବସ୍ଥାରେ ତାଙ୍କୁ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଘଟଣାସ୍ଥଳରେ ଟାଉନ୍ ଥାନା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
