ଭୁବନେଶ୍ୱର : ଅନୁଗୋଳ ଜିଲ୍ଲାର ଛେଣ୍ଡିପଦା ଅଞ୍ଚଳର ଯୁବକମାନଙ୍କ ଉନ୍ନତ ଭବିଷ୍ୟତ ଗଠନ କରିବା ଲକ୍ଷ୍ୟରେ ଗୁଜରାଟ ମିନେରାଲ୍ ଡେଭଲପମେଣ୍ଟ କର୍ପୋରେଶନ୍ (ଜିଏମଡିସି) ବିଭିନ୍ନ ଦକ୍ଷତା ବିକାଶ ପ୍ରଶିକ୍ଷଣ କାର୍ଯ୍ୟକ୍ରମ କରିଆସିଛି । ନିଜର ସାମାଜିକ ଦାୟିତ୍ବ ଶାଖା, ଗ୍ରାମ୍ୟ ବିକାଶ ଟ୍ରଷ୍ଟ (ଜିଏମଡିସି-ଜିଭିଟି) ଅଧୀନରେ ଏହି କାର୍ଯ୍ୟକ୍ରମ ସ୍ଥାନୀୟ ଯୁବକମାନଙ୍କୁ ସିଏନସି ଟର୍ନିଂ ଏବଂ ଜେନେରାଲ ଡ୍ୟୁଟି ଆସିଷ୍ଟାଣ୍ଟ (ଜିଡିଏ) ପାଠ୍ୟକ୍ରମରେ ତାଲିମ ପ୍ରଦାନ କରି ନିଯୁକ୍ତିଯୋଗ୍ୟ ଦକ୍ଷତା ଏବଂ ଉଜ୍ଜ୍ୱଳ ଭବିଷ୍ୟତ ପାଇଁ ପ୍ରସ୍ତୁତ କରୁଅଛି ।
ଏହି କାର୍ଯ୍ୟକ୍ରମର ଅଂଶ ସ୍ୱରୂପ, ପ୍ରାୟ ୪୦ ଜଣ ଛାତ୍ର ବୁଧବାର ଦିନ ଭାରତ ସରକାରଙ୍କ ଭୁବନେଶ୍ୱର ସ୍ଥିତ ସେଣ୍ଟ୍ରାଲ ଟୁଲ ରୁମ ଆଣ୍ଡ ଟ୍ରେନିଂ ସେଣ୍ଟର (ସିଟିଟିସି) କୁ ପରିଦର୍ଶନରେ ଯାଇଥିଲେ। ଦକ୍ଷତା ବିକାଶ ବୃଦ୍ଧି କ୍ଷେତ୍ରରେ ସିଟିଟିସି, ଦେଶର ଏକ ଖ୍ୟାତିସମ୍ପନ୍ନ ପ୍ରତିଷ୍ଠିତ ଅନୁଷ୍ଠାନ । ଏହି ଅନୁଷ୍ଠାନ ଜିଏମଡିସି-ଜିଭିଟି ଦ୍ବାରା ପ୍ରସ୍ତାବିତ ସ୍ବତନ୍ତ୍ର ସିଏନସି ଟର୍ନିଂ ପାଠ୍ୟକ୍ରମ ଛେଣ୍ଡିପଦା ଅଞ୍ଚଳର ଯୁବକମାନଙ୍କ ପାଇଁ ପ୍ରସ୍ତୁତ କରିଛି, ଯାହା ତାଲିମ ସମାପ୍ତି ପରେ ନିଶ୍ଚିତ ନିଯୁକ୍ତିର ସୁଯୋଗ ପ୍ରଦାନ କରିଥାଏ। ଛାତ୍ରମାନେ ସିଟିଟିସିର ଲ୍ୟାବ ଏବଂ ଉତ୍ପାଦନ ଯୁନିଟଗୁଡିକୁ ପରିଦର୍ଶନ କରିଥିଲେ, ଏଥିସହ ତାଲିମରେ ବ୍ୟବହୃତ ଉପକରଣଗୁଡିକୁ ମଧ୍ୟ ନିକଟରୁ ଦେଖି ସମ୍ୟକ ଜ୍ଞାନ ଗ୍ରହଣ କରିଥିଲେ । ଏହି ପରିଦର୍ଶନ ସମୟରେ ଛାତ୍ରମାନେ ପ୍ରଶିକ୍ଷଣ ସୁବିଧା, ପାଠ୍ୟକ୍ରମ ଏବଂ ନିଯୁକ୍ତି ସମ୍ଭାବନା ସମ୍ବନ୍ଧରେ ଜାଣିବାର ସୁଯୋଗ ମଧ୍ୟ ପାଇଥିଲେ।
ଏହି ପରିଦର୍ଶନ ଦ୍ୱାରା ଉତ୍ସାହିତ ହୋଇ, ଅନେକ ଆଗ୍ରହୀ ଛାତ୍ର ବର୍ତ୍ତମାନ ଏହି ପାଠ୍ୟକ୍ରମରେ ନାମ ଲେଖାଇବାକୁ ପ୍ରସ୍ତୁତ ହେଉଛନ୍ତି। “ଜିଏମଡିସି ଆମର ରହିବା, ଖାଇବା ଓ ପ୍ରଶିକ୍ଷଣର ସମସ୍ତ ଖର୍ଚ୍ଚ ବହନ କରିବ, ଏହା ଆମ ପାଇଁ ସୁବର୍ଣ୍ଣ ସୁଯୋଗ ଏବଂ ଏକ ଉତ୍ତମ ଭବିଷ୍ୟତ ଗଢିବା ପାଇଁ ସାହାଯ୍ୟ କରିବ” ବୋଲି ଜଣେ ଛାତ୍ର କହିଛନ୍ତି ।
ଜିଏମଡିସି ସିଏନସି ଟର୍ନିଂ ଏବଂ ଜେନେରାଲ ଡ୍ୟୁଟି ଆସିଷ୍ଟାଣ୍ଟ (ଜିଡିଏ) ପାଠ୍ୟକ୍ରମ ପାଇଁ ସିଟିଟିସି ଏବଂ ଡକ୍ଟର ରେଡ୍ଡି ଲ୍ୟାବ ସହିତ ବୁଝାମଣା ଚୁକ୍ତିପତ୍ର (ଏମଓୟୁ) ସ୍ବାକ୍ଷର କରିଛି। ଜିଏମଡିସି ପକ୍ଷରୁ କୁହାଯାଇଛି ଯେ, “ଆମେ ଛେଣ୍ଡିପଦା ଅଞ୍ଚଳର ସମ୍ପୂର୍ଣ୍ଣ ବିକାଶ ପାଇଁ ପ୍ରତିଶୃତିବଦ୍ଧ। ଦକ୍ଷତା ଆଧାରିତ ପ୍ରଶିକ୍ଷଣ ଏବଂ ନିଯୁକ୍ତି ସହାୟତା ପ୍ରଦାନ କରି, ଆମେ ଛେଣ୍ଡିପଦାର ଯୁବକଯୁବତୀଙ୍କୁ ସଶକ୍ତ କରିବା ସହ ସେମାନଙ୍କୁ ଆର୍ଥିକ ସ୍ବଚ୍ଛଳତା ପ୍ରଦାନ କରିବା ଲକ୍ଷ୍ୟରେ କାର୍ଯ୍ୟ କରୁଛୁ।”
ବିଭିନ୍ନ ପ୍ରକାର ସାମାଜିକ ଦାୟିତ୍ବବୋଧ କାର୍ଯ୍ୟକ୍ରମ ମାଧ୍ୟମରେ ଜିଏମଡିସି କେବଳ ଦକ୍ଷତା ବିକାଶକୁ ପ୍ରୋତ୍ସାହନ ଦେଉନାହିଁ ବରଂ ଏହି ଅଞ୍ଚଳର ସାମାଜିକ-ଆର୍ଥିକ ବିକାଶରେ ନିଜକୁ ସାମିଲ କରି, ପରବର୍ତ୍ତୀ ପିଢିକୁ ସଫଳତା ପାଇଁ ଆବଶ୍ୟକୀୟ ଉପକରଣ ଓ ପ୍ରଶିକ୍ଷଣ ସହିତ ସଶକ୍ତ କରୁଛି।
