ଅନୁଗୋଳ: ଗଜଲକ୍ଷ୍ମୀ ପୂଜା ପାଇଁ ଚଳଚଞ୍ଚଳ ଶିଳ୍ପ ନଗରି ଅନୁଗୋଳ। ଦୁର୍ଗା ପୂଜା ପରେ ବର୍ତ୍ତମାନ ମା’ ଗଜଲକ୍ଷ୍ମୀଙ୍କ ପୂଜାକୁ ନେଇ ବିଭିନ୍ନ ପୂଜା ମଣ୍ଡପରେ ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି। ରବିବାର ମା ଗଜଲକ୍ଷ୍ମୀଙ୍କ ପୂଜା ମହାସମାରୋହରେ ପାଳନ କରାଯିବ। ଦୁଇ ବର୍ଷ କରୋନା କଟକଣା ପାଇଂ ବନ୍ଦ ଘରେ ମ ପୂଜା ପାଉଥିବା ବେଳେ ଚଳିତ ବର୍ଷ ପୂର୍ବ ବର୍ଷ ପରି ମାଙ୍କ ପୂଜା ଅନୁଗୋଳ ରେ ହେବ ।
ଚଳିତ ମାସ ୯ ତାରିଖରୁ ଅକ୍ଟୋବର ୧୮ ପର୍ଯ୍ୟନ୍ତ ସହରରେ ମହା ସମାରୋହରେ ମାଙ୍କୁ ପୂଜା କରାଯିବ । ଏଥିପାଇଁ ଏବେ ସଜେଇ ହେଲାଣି ଅନୁଗୋଳ ସହର । ସବୁଠି ଚାଲିଛି ମାଙ୍କ ଆବାହନ ପୂର୍ବରୁ ପ୍ରସ୍ତୁତି ପର୍ବ । କିଏ ମୂର୍ତ୍ତି ନିର୍ମାଣଙ୍କୁ ଅଧିକ ଗୁରୁତ୍ଵ ଦେଇଛି ତ ଆଉ କିଏ ତୋରଣ ନିର୍ମାଣ ଉପରେ ଦେଇଛି ଗୁରୁତ୍ଵ । ପୂଜା ପ୍ରସ୍ତୁତିରେ ଲାଗିପଡିଛନ୍ତି ଶିଳ୍ପୀ ଓ କାରିଗର । ନିଜ ନିଜ ର ପୂଜା ମଣ୍ଡପ ଗୁଡିକୁ ଆକର୍ଷଣୀୟ କରିବା ପାଇଁ ସତେଯେମିତି ଏମାନଙ୍କ ମଧ୍ୟରେ ଚାଲିଛି ପ୍ରତିଯୋଗୀତା । ରାଜ୍ୟ ତଥା ରାଜ୍ୟ ବାହାରର ମୂର୍ତ୍ତି କାରିଗର ଏଥର ଅନୁଗୋଳ ରେ ମୂର୍ତି ନିର୍ମାଣ କରୁଛନ୍ତି ।
ଏଥର ସହର ମଧ୍ୟରେ ୩୦ ରୁ ଅଧିକ ମଣ୍ଡପରେ ଗଜଲକ୍ଷ୍ମୀ ଙ୍କୁ ପୂଜା କରାଯାଉଥିବା ବେଳେ ସହର ବାହାରେ ୬୦ ରୁ ଅଧିକ ମଣ୍ଡପରେ ପୂଜା ପାଇବେ ମା ମହାଲକ୍ଷ୍ମୀ । ସବୁଠି ପ୍ରସ୍ତୁତି ପର୍ବ ପ୍ରାୟତ ସେଶ ପର୍ଯ୍ୟାୟରେ । ପୂଜା ପାଇଁ ସାରା ସହରରେ ଏବେ ସାରା ଛାଇ ଗଲାଣି ଆଲୋକର ତୋରଣ । ରାତି ପାହିଲେ ମାଙ୍କ ପୂଜା ଥିବାରୁ କେତେକ ପୂଜା ମଣ୍ଡପ ର ରେ ପ୍ରସ୍ତୁତି ପ୍ରାୟତ ଶେଷ ହୋଇଛି ।
୯ ତାରିଖରୁ ଆରମ୍ଭ ହୋଇ ୧୮ ତାରିଖ ଯାଏ ଚାଲିବାକୁ ଥିବା ପୂଜା ଆସନ୍ତା ୧୯ ତାରିଖରେ ଭସାଣି ଉତ୍ସବ ସହ ମା’ଙ୍କୁ ମେଲାଣି ଦିଆଯିବ। ତେବେ ଭସାଣି ଉତ୍ସବକୁ କିପରି ଆୟୋଜନ କରାଯିବ ସେ ନେଇ କେନ୍ଦ୍ରୀୟ ପୂଜା କମିଟି ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି। କେନ୍ଦ୍ରୀୟ ପୂଜା କମିଟି ସଭାପତି ଅକ୍ଷୟ କୁମାର ସାମନ୍ତଙ୍କ ସୂଚନା ଅନୁସାରେ ଅନୁଗୋଳ ଲକ୍ଷ୍ମୀପୂଜାରେ ମେଲଣ ଉତ୍ସବ ଓ ଆତସବାଜି କାର୍ଯ୍ୟକ୍ରମ ଆକର୍ଷଣର କେନ୍ଦ୍ରବିନ୍ଦୁ ପାଲଟିଥାଏ। ହେଲେ ଚଳିତବର୍ଷ ମେଲଣ ଉତ୍ସବ ଧୁମ୍ଧାମରେ ପାଳନ କରାଯିବାକୁ ଥିବାବେଳେ ଆତସବାଜି ଉପରେ ଅଙ୍କୁଶ ଲଗାଯାଇଛି। ସେହିପରି ସମସ୍ତ ସାଉଣ୍ଡ ସିଷ୍ଟମର ଉଚ୍ଚତା ୧୨ ଫୁଟରୁ କମ୍ ଓ ସର୍ବନିମ୍ନ ଓସାର କରିବାକୁ ନିର୍ଦ୍ଦେଶ ଦିଆଯାଇଛି। ଅପରାହ୍ନ ୩ଟା ପୂର୍ବରୁ ମେଲଣ ଆରମ୍ଭ ହେବ। ମୋଟ୍ ୧୨ଟି ପୂଜା କମିଟି ମେଲଣରେ ଭାଗ ନେବେ। ୩ଟା ପୂର୍ବରୁ ଏହି କମିଟିମାନେ ନିଜର ମେଢ଼ ଆଣି ଥାନା ଛକ ଠାରୁ ଜାତୀୟ ରାଜପଥରେ ବୁଢ଼ୀ ଠାକୁରାଣୀ ମନ୍ଦିର ପର୍ଯ୍ୟନ୍ତ ଛଡ଼ା କରିବେ। ୩ଟାରେ ଏସ୍ପି କାର୍ଯ୍ୟକ୍ରମର ଶୁଭାରମ୍ଭ କରିବା ପରେ ଲଟେରି ଅନୁଯାୟୀ କ୍ରମାନ୍ବୟରେ ମେଢ଼ ଶୋଭାଯାତ୍ରା ଆରମ୍ଭ ହେବ।
ଥାନା ଛକରୁ ରାଜା ଛକ ଦେଇ ବଜାର ଓ ହରିମହୁରୀ ଛକ ଦେଇ ପୁନର୍ବାର ଥାନା ଛକ ଠାରେ ଏକାଠି ହେବା ପରେ ବିସର୍ଜନ କାର୍ଯ୍ୟକ୍ରମ ଆରମ୍ଭ ହେବ। ଯେଉଁ ପୂଜା କମିଟି ମେଲଣରେ ଭାଗ ନେବେ ନାହିଁ, ସେମାନେ ଅପରାହ୍ନ ୩ଟା ପୂର୍ବରୁ ଭସାଣି ସାରିବେ। ମୂର୍ତ୍ତି ବିସର୍ଜନ ପାଇଁ ପ୍ରଶାସନ ପକ୍ଷରୁ ଅସ୍ଥାୟୀ ଜଳାଶୟ ନିର୍ମାଣ କରାଯିବ। ପୂଜାକୁ ଶାନ୍ତିଶୃଙ୍ଖଳାର ସହ ଆୟୋଜନ କରିବାକୁ ସମସ୍ତ ପୂଜା କମିଟି ପକ୍ଷରୁ ସ୍ବେଚ୍ଛାସେବୀ ନିୟୋଜିତ କରାଯିବ ବୋଲି କେନ୍ଦ୍ରୀୟ ପୂଜା କମିଟି ସଭାପତି ସାମନ୍ତ ପ୍ରକାଶ କରିଛନ୍ତି। ଏହି ଖବରଦାତା ସମ୍ମିଳନୀରେ ଉପସଭାପତି କିଶୋର କୁମାର କର, ସୁନୀଲ କୁମାର ସାହୁ, ସମ୍ପାଦକ ପୂର୍ଣ୍ଣଚନ୍ଦ୍ର ରାଉତ, ସମ୍ପାଦକ ରଞ୍ଜିତ ମାଣ୍ଡେଠିଆ, କୋଷାଧ୍ୟକ୍ଷ ଅକ୍ଷୟ କୁମାର ଦାସଙ୍କ ସମେତ ଅନ୍ୟ କାର୍ଯ୍ୟକର୍ତ୍ତାମାନେ ଉପସ୍ଥିତ ଥିଲେ।
