ଭୁବନେଶ୍ବର: ଆଜି ଉପସ୍ଥାପିତ ହୋଇଥିବା ୨୦୨୨-୨୩ ବର୍ଷ ପାଇଁ ରାଜ୍ୟ ବଜେଟ୍ ଏକ ପ୍ରଗତିଶୀଳ, ଗରିବ-ଅନୁକୂଳ ଏବଂ ବିକାଶମୂଳକ ବଜେଟ୍ ବୋଲି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ | ରାଜ୍ୟ ବଜେଟ ସଂପର୍କରେ ପ୍ରତିକ୍ରିୟା ରଖି ସେ କହିଛନ୍ତି ଯେ ଏହି ବଜେଟ୍ ଆକାର ୨ ଲକ୍ଷ କୋଟି ହୋଇଥିବା ବେଳେ କାର୍ଯ୍ୟକ୍ରମ ରୂପାୟନ ଲାଗି ବଜେଟ୍ ୧ ଲକ୍ଷ କୋଟିକୁ ବୃଦ୍ଧି ପାଇଛି। ଗୁଣାତ୍ମକ ସ୍ୱାସ୍ଥ୍ୟସେବା ସୁବିଧା, ବିଦ୍ୟାଳୟର ରୂପାନ୍ତରୀକରଣ, ଜୀବନ ଏବଂ ଜୀବିକା, ମହିଳା ସଶକ୍ତୀକରଣ ତଥା ଭିତ୍ତିଭୂମି ବିକାଶ ସହିତ ଗୁଣାତ୍ମକ ଶିକ୍ଷା ସୃଷ୍ଟି କରିବା ବଜେଟର ପ୍ରାଥମିକତା।
ଏଥର ପୁଞ୍ଜିବ୍ୟୟ ୫୬ ପ୍ରତିଶତରୁ ଅଧିକ ବୃଦ୍ଧି ପାଇବ, ଯାହା ଅଭିବୃଦ୍ଧିରେ ସହାୟକ ହେବ |୨୦୦୦ କୋଟି ଟଙ୍କା ବ୍ୟୟବରାଦ ସହିତ ମିଶନ ଶକ୍ତି ପାଇଁ ପୃଥକ ବଜେଟ୍ ଆମ ରାଜ୍ୟର ୭୦ ଲକ୍ଷ ମହିଳାଙ୍କ ସହ ଆମର ଯୋଗଦାନକୁ ଆହୁରି ଦୃଢ଼ କରିବ। ବଜେଟ୍ ସ୍ଥିରୀକରଣ ପାଣ୍ଠି ସୃଷ୍ଟି କରିବାକୁ ଆମର ପଦକ୍ଷେପ ଭବିଷ୍ୟତରେ ଯେକୌଣସି ରାଜସ୍ୱ କ୍ଷତିକୁ ହ୍ରାସ କରିବାରେ ସାହାଯ୍ୟ କରିବ। ବଜେଟ୍ ୫-ଟି ଏବଂ ମୋ ସରକାର ଅଧୀନରେ ଆମର ପରିବର୍ତ୍ତନଶୀଳ ଏଜେଣ୍ଡା ସହିତ ଅନୁରୂପ ଅଟେ। ମୁଁ ଆଶା କରୁଛି ଏହି ବଜେଟ୍ ରାଜ୍ୟବାସୀଙ୍କ ଆକାଂକ୍ଷାକୁ ପୂରଣ କରିବ ବୋଲି ମତ ରଖିଛନ୍ତି ମୁଖ୍ୟମନ୍ତ୍ରୀ।
ରାଜ୍ୟ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ଆଜି ବର୍ଷ ୨୦୨୨-୨୩ ପାଇଁ ରାଜ୍ୟ ବଜେଟ୍ ଉପସ୍ଥାପନ କରିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପସ୍ଥିତିରେ ସେ ବିଧାନସଭାରେ ବଜେଟ୍ ଉପସ୍ଥାପନ କରିଛନ୍ତି ।ପୂର୍ବ କିଛି ବର୍ଷ ପରି ଏଥର ମଧ୍ୟ ବଜେଟକୁ ଦୁଇଭାଗରେ ବିଭକ୍ତ କରାଯାଇଛି । ବଜେଟର ପ୍ରଥମ ଭାଗ କୃଷି ବଜେଟ ହୋଇଥିବାବେଳେ ଦ୍ବିତୀୟ ଭାଗ ସାଧାରଣ ବଜେଟ କୁହାଯାଉଛି । ୨ ଲକ୍ଷ କୋଟିର ଏହି ବଜେଟକୁ ଅର୍ଥମନ୍ତ୍ରୀ ଏକ ଐତିହାସିକ ବଜେଟ ବୋଲି କହିଛନ୍ତି। ଗତ ୨୨ ବର୍ଷ ମଧରେ ବଜେଟର ପରିମାଣ ୧୭ ଗୁଣା ବୃଦ୍ଧିପାଇଛି ଓ ବିଭିନ୍ନ କାର୍ଯ୍ୟକ୍ରମ ନିମିତ୍ତ ବ୍ୟୟ ୨୮ ଗୁଣା ବୃଦ୍ଧି ପାଇଛି ବୋଲି ନିଜ ଅଭିଭାଷଣରେ ଅର୍ଥମନ୍ତ୍ରୀ ସୂଚନା ଦେଇଛନ୍ତି । ସୂଚନାଯୋଗ୍ୟ, ରାଜ୍ୟ ସରକାର କରିଥିବା ୨ ଲକ୍ଷ କୋଟିର ବ୍ୟୟ ଅଟକଳ ନିମନ୍ତେ ରାଜସ୍ୱ ପ୍ରାପ୍ତି ରୁ ୧ ଲକ୍ଷ ୬୩ ହଜାର ୯୬୭ କୋଟି ଟଙ୍କା ସଂଗ୍ରହ କରାଯିବ ଓ ଋଣ ତଥା ଏବଂ ଅନ୍ୟାନ୍ୟ ବାବଦରୁ ୩୬ ହଜାର ୩୩ କୋଟି ଟଙ୍କା ସଂଗ୍ରହ କରାଯିବ ।
