ଅନୁଗୋଳ: ଅନୁଗୋଳ ବ୍ଲକ ସାହାରାଗୁଡା ଗାଁଦେଇ ଯାଇଥିବା ଟାକୁଆ ନାଳ ଉପରେ ଚାଲିଛି ୪ଫୁଟର ବର୍ଷା ଜଳ। ଫଳରେ ଗାଁ ଲୋକମାନେ ଗାଁ ରୁ ବାହାରି ପାରିନାହାନ୍ତି କି ଅନ୍ୟ ଗାଁ ଲୋକେ ସାହାରାଗୁଡା ଗାଁ ଆସି ପାରୁନାହାନ୍ତି।
ସୂଚନାନୁସାରେ ଅନୁଗୋଳ ବ୍ଲକ ବନ୍ତଳା ପଞ୍ଚାୟତ ସାହାରାଗୁଡା ଗାଁକୁ ଯିବାକୁ ହେଲେ ଟାକୁଆ ନାଳ ପାରି ହୋଇ ଯିବାକୁ ପଡିଥାଏ। ବର୍ଷା ଋତୁରେ ଲଗାଣ ବର୍ଷା ହେଲେ ଏହି ନାଳରେ ଥିବା ପୋଲ ଉପରେ ୪ରୁ୫ଫୁଟର ବର୍ଷା ଜଳ ପ୍ରବାହିତ ହୋଇଥାଏ। ଏହାକୁ ଦୃଷ୍ଟିରେ ରଖି ସରକାରଙ୍କ ପକ୍ଷରୁ ସେଠାରେ ୨୦୦୨ମସିହାରେ ପୋଲ ନିର୍ମାଣ କରାଯାଇଥିଲା। ତେବେ ଉକ୍ତ ଉଚ୍ଚତା କମ ଥିବାରୁ ପୋଲ ଉପରେ ବର୍ଷା ଜଳ ପ୍ରବାହିତ ହେଉଛି। ନାଳ ଉପରେ ଏବେ ୪ଫୁଟର ପାଣି ଯାଉଥିବାରୁ ଗ୍ରାମର ଲୋକମାନେ ନିଜର କାର୍ଯ୍ୟ କରିବା ପାଇଁ ଆଜି ବନ୍ତଳା ସହ ଅନୁଗୁଳ ସହରକୁ ଯାଇପାରିନାହାନ୍ତି। ତେବେ ଏହି ସମସ୍ୟା ସମ୍ପର୍କରେ ପ୍ରଶାସନ ଅବଗତ ଥିଲେ ମଧ୍ୟ ସେଠାରେ ଏକ ଉଚ୍ଚ ପୋଲ ନିର୍ମାଣ ପାଇଁ ସେଭଳି କିଛି ପ୍ରଶାସନିକ ଭାବରେ ପଦକ୍ଷେପ ନିଆଯାଇନାହିଁ। ଫଳରେ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖା ଦେଇଛି।
