ଅନୁଗୋଳ: ଅନୁଗୋଳ ବିଜୁ ମୈଦାନ ପରିସରରେ ୫ ମ ଅନୁଗୋଳ ସପିଙ୍ଗ ଫେଷ୍ଟିଭାଲ ଉଦଘାଟିତ ହୋଇଯାଇଛି । ଅନୁଗୋଳ ଓକିଲ ସଂଘର ସଭାପତି ଦିଲିପ ସାହୁ ମୁଖ୍ୟ ଅତିଥି ଭାବେ ଯୋଗ ଦେଇ ଫିତା କାଟି ଆନୁଷ୍ଠାନିକ ଭାବେ ଉଦଘାଟନ କରିଥିଲେ । ଅନ୍ୟ ମାନଙ୍କ ମଧ୍ୟରେ କେନ୍ଦ୍ରିୟ ପୂଜା କମିଟିର ସମ୍ପାଦକ ଦିଲିପ ସାହୁ, ଓଷ୍ଟାର ଅନୁଗୋଳ ଶାଖା ପୂର୍ବତନ ସଭାପତି ସରୋଜ ପାଣିଗ୍ରାହୀ ଓ ପତଞ୍ଜଳି ଯୋଗ ସମିତିର ସଭାପତି ଅଭୟ ରାୟ ଓ ସମାଜସେବୀ ପର୍ଶୁରାମ ଦାଶ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ ।
କୋଭିଡ ମହାମାରୀ କାରଣରୁ ଦୀର୍ଘ ଦୁଇ ବର୍ଷ ହେବ ବିଭିନ୍ନ ସାମୁହିକ କାର୍ଯ୍ୟକ୍ରମ ଉପରେ ରୋକ ଲଗାଯାଇଥିବା ବେଳେ ଚଳିତ ବର୍ଷ ଏହାକୁ ଅନୁମତି ମିଳିଛି ।ପାର୍ବଣ ଋତୁ ସାଙ୍ଗକୁ ଅକ୍ଟୋବର ୧୧ ତାରିଖ ଠାରୁ ଏହି ଶପିଂ ଫେଷ୍ଟିଭାଲ ଆରମ୍ଭ ହୋଇ ୧୯ ତାରିଖ ପର୍ଯ୍ୟନ୍ତ ଚାଲୁରହିବ । ମେଳାକୁ ସିଗନେଚର୍ ଥ୍ରୀ ଗ୍ରୁପର ମୁଖ୍ୟ ସଞ୍ଜୟ କୁମାର ସାହୁ ପରିଚାଳନା କରୁଥିବା ବେଳେ ଏହି ମେଳାରେ ୮୦ ଗୋଟି ଷ୍ଟଲ୍ ପଡିଅଛି ।
ରାଜ୍ୟ ତଥା ରାଜ୍ୟ ବାହାରୁ ବିଭିନ୍ନ ପ୍ରକାରର ଘରକରଣା,ବୈଦ୍ୟୁତିକ ସାମଗ୍ରୀ ତଥା ନିତ୍ୟ ବ୍ୟବହାର୍ଯ୍ୟ ଆବଶ୍ୟକୀୟ ସାମଗ୍ରୀର ଷ୍ଟଲ ମାନ ଖୋଲା ହୋଇଛି । ମେଳାକୁ ବୁଲି ଆସିବା ସହିତ ନିଜ ମନ ପସନ୍ଦର ସାମଗ୍ରୀ କିଣିବା ସାଙ୍ଗକୁ ଦୋଳି, ମୀନାବଜାର ଓ ଫୁଡ୍ କୋର୍ଟ ବୁଲିବାକୁ ଆୟୋଜକଙ୍କ ତରଫରୁ ଅନୁରୋଧ କରାଯାଇଛି ।
