ପାଳଲହଡା : ନାହିଁ ନାହିଁ ରେ ଚାଲିଛି ପାଳଲହଡା ଉପଖଣ୍ଡୀୟ ଚିକିତ୍ସାଳୟରେ ଚାଲିଛି ରୋଗୀ ସେବା । ବିବାଦ ରେ ସର୍ବଦା ଚର୍ଚ୍ଚା ର ସିରୋନାମା ପାଲଟୁଛି ପାଳଲହଡା ଡାକ୍ତରଖାନା । କେତେବେଳେ ରୋଗୀ ସେବାରେ ଅବହେଳା କୁ ନେଇ ତ ଆଉ କେତେବେଳେ ଶବ ବୁହାକୁ ନେଇ । ଏଠି ସରକାରୀ ବିଧି ବ୍ୟବସ୍ଥା ଭିତରେ ହଜି ଯାଉଛି କର୍ମଚାରୀଙ୍କ ମାନବିକତା । ଟଙ୍କା ନାହିଁ ତ ମହାପ୍ରୟାଣ ଗାଡି ନାହିଁ , ତାଠାରୁ ବଳି ଯାଉଛି ରାତି ଅଧରେ ଶବ ବୁହା ଗାଡି ଡ୍ରାଇଭର ଙ୍କ ଜୁଲୁମ । ଗତକାଲି ଏମିତି ଏକ ଅଭାବନୀୟ ଘଟଣା ଘଟିଛି ପାଳଲହଡା ଡାକ୍ତରଖାନା ପରିସରରେ ।
ସୂଚନା ଅନୁସାରେ ଗତକାଲି ରାତି ଦଶ ଘଟିକା ସମୟରେ ପାଳଲହଡା ଠାରୁ ସାତ କିଲୋମିଟର ଦୂର କନ୍ତଳା ଗାଁ ର ହରିହର ଗଡନାୟକ (ବୟସ 47 ) ଙ୍କ ଦେହ ହଠାତ ଅସୁସ୍ଥ ହୋଇ ପଡିବାରୁ ପରିବାର ଲୋକେ ଚିକିତ୍ସା ପାଇଁ ପାଳଲହଡା ଡାକ୍ତରଖାନାରେ ଭର୍ତ୍ତି କରିଥିଲେ । ଡାକ୍ତର ଜୀବନ ଜ୍ୟୋତି ଦାଶଙ୍କ ଚେଷ୍ଟା ସତ୍ବେ ହରିହର ଙ୍କ ମୃତ୍ୟୁ ହୋଇଥିଲା । ଡାକ୍ତର ଖାନାରୁ ଶବ କୁ ଘରକୁ ନେବା ପାଇଁ ଡାକ୍ତରଖାନା କତୃପକ୍ଷ ଙ୍କ ନିକଟରେ ପରିବାର ଲୋକେ କାକୁତି ମିନତି ହୋଇଥିଲେ ସୁଦ୍ଧା କେହି ଶୁଣି ନଥିବା ଅଭିଯୋଗ ହୋଇଛି । ଖବର ପାଇ ଘଟଣା ସ୍ଥଳରେ ଆମ ପ୍ରତିନିଧି ହସ୍ତକ୍ଷେପ କରିବା ପରେ ହେଲ୍ପ ଡେକ୍ସ କର୍ମଚାରୀଙ୍କ ସହାୟତାରେ ଶବ ନେବା ପାଇଁ ସରକାରୀ ମହାପ୍ରୟାଣ ଗାଡ଼ି ମଞ୍ଜୁର ହୋଇଥିଲା ସତ ମାତ୍ର ସେଥିପାଇଁ ଦୁଇ ଘଣ୍ଟା ଲାଗିଥିଲା । ମହାପ୍ରୟାଣ ର ଗାଡିର ଡ୍ରାଇଭର ,ମୃତକଙ୍କ ସମ୍ପର୍କୀୟଙ୍କୁ ରାସନକାର୍ଡ ମାଗିଥିଲେ ଓ ସିଧାସଳଖ କହିଥିଲେ କାର୍ଡ ନଦେଲେ ଗାଡି ଗଡିବ ନାହିଁ। ଯାହାକୁ ନେଇ ଉଭୟ ଙ୍କ ମଧ୍ୟରେ ଯୁକ୍ତିତର୍କ ହେବା ସହ ମହାପ୍ରୟାଣ ର ଗାଡିର ଡ୍ରାଇଭର ମୃତକଙ୍କ ଦୁର୍ବ୍ୟବହାର କରିବାକୁ ମଧ୍ୟ ପଛାଇ ନଥିଲେ । ଟଙ୍କା ନାହିଁ ତ ମହାପ୍ରୟାଣ ଗାଡି ନାହିଁ , ପାଞ୍ଚ ଶହ ଟଙ୍କା ଦେଲେ ଗାଡି ଗଡିବ । ଶେଷରେ ଡ୍ରାଇଭରଙ୍କୁ ପାଞ୍ଚ ଶହ ଟଙ୍କା ଦେଇଥିଲେ ତାପରେ ଡ୍ରାଇଭର ଗାଡି ରେ ଶବ ନେବା ପାଇଁ ରାଜି ହୋଇଥିଲେ । ତେବେ ସରକାରୀ ନିୟମ ଅନୁସାରେ ରାସନକାର୍ଡ ଧାରି ଙ୍କୁ ମାଗଣା ସେବା ଯୋଗାଇ ଦିଆଯିବାର ବ୍ୟବସ୍ଥା ଥିବା ବେଳେ ସାଧାରଣ ଲୋକଙ୍କ ପାଇଁ କିଲୋମିଟର କୁ ଆଠ ଟଙ୍କା ହିସାବରେ ପୈଠ କରାଯିବାର ସରକାରୀ ବିଧି ବ୍ୟବସ୍ଥା ରହିଛି । କିନ୍ତୁ ପାଳଲହଡା ଡାକ୍ତର ଖାନାରେ ଏଥିରେ ବ୍ୟତିକ୍ରମ ହୋଇଥିବା ଅଭିଯୋଗ ହୋଇଛି ଡାକ୍ତରଖାନା କତୃପକ୍ଷ ଓ ରୋଗୀକଲ୍ୟାଣ ସମିତି ସବୁ ବିଷୟରେ ଅବଗତ ଥାଇ ମଧ୍ୟ କାହିଁକି ମୁହଁରେ ତୁଣ୍ଡି ମାରି ଚୁପ ରୁହନ୍ତି ଏହାକୁ ନେଇ ଉଠିଛି ପ୍ରଶ୍ନ । ପରିବାର ଲୋକଙ୍କ ଅଭିଯୋଗ କୁ ନେଇ ଆମେ ଡାକ୍ତରଖାନା କତୃପକ୍ଷ ଙ୍କୁ ଯୋଗାଯୋଗ କରିଥିଲେ ସୁଦ୍ଧା କୈଣସି ଉତ୍ତର ମିଳି ନଥିଲା ।
